दिवाळी सणानिमित्त खरेदीसाठी ईश्वरपूरच्या बाजारपेठेत आलेल्या महिलेच्या नातवाची हरवलेली एक तोळ्याची सोन्याची चेन शोधून ती परत करण्यात ईश्वरपूर पोलिसांना यश आले. पोलिसांच्या या तत्परतेचे सर्वत्र कौतुक होत आहे.
याबाबत अधिक माहिती अशी की, दि. ७ नोव्हेंबर २०२६ रोजी मनीषा बापू क्षीरसागर (रा. ताकारी) या दिवाळीच्या खरेदीसाठी ईश्वरपूर येथील बाजारपेठेत आल्या होत्या. यावेळी त्यांच्या नातवाच्या गळ्यातील एक तोळ्याची सोन्याची चेन बाजारपेठेत हरवली होती.
या घटनेची दखल घेत ईश्वरपूर पोलिसांनी तांत्रिक तपास आणि गोपनीय माहितीच्या आधारे चेनचा शोध सुरू केला. पोलिसांच्या अथक प्रयत्नांमुळे हरवलेली सोन्याची चेन शोधून काढण्यात यश आले. त्यानंतर सोमवार, दि. १६ नोव्हेंबर रोजी ही चेन मनीषा क्षीरसागर यांच्याकडे सुपूर्द करण्यात आली.
हरवलेली मौल्यवान वस्तू पुन्हा मिळाल्याने क्षीरसागर यांनी ईश्वरपूर पोलीस ठाण्यातील अधिकारी व कर्मचाऱ्यांचे आभार मानून समाधान व्यक्त केले.
ही कामगिरी पोलीस निरीक्षक संदीप पाटील व सहाय्यक पोलीस निरीक्षक हरिश्चंद्र गावडे यांच्या मार्गदर्शनाखाली पोलीस हवालदार कुबेर खोत, पोलीस कर्मचारी दीपक घस्ते, विशाल पांगे, अमोल सावंत, शशिकांत शिंदे तसेच महिला पोलीस अंमलदार यांनी केली.
ईश्वरपूर पोलिसांच्या या तत्पर आणि कौतुकास्पद कामगिरीचे नागरिकांतून अभिनंदन होत आहे.










