कोल्हापूर : कोल्हापूरच्या शाही दसरा महोत्सव २०२६ च्या अनुषंगाने जिल्ह्यातील सर्व शाळांमध्ये सोमवार, दिनांक १२ ऑक्टोबर रोजी ‘पारंपरिक वेशभूषा दिवस’ साजरा करण्यात येणार आहे. याबाबत जिल्हा परिषदेच्या प्राथमिक व माध्यमिक शिक्षण विभागाने सूचना जारी केल्या आहेत.
राज्य शासनाने ‘कोल्हापूरचा शाही दसरा महोत्सव’ हा राज्याचा महोत्सव म्हणून घोषित केला असून, या महोत्सवाच्या दुसऱ्या दिवशी पारंपरिक वेशभूषा दिवस साजरा करण्याचे नियोजन करण्यात आले आहे.
या उपक्रमांतर्गत जिल्ह्यातील सर्व व्यवस्थापनांच्या प्राथमिक, माध्यमिक व उच्च माध्यमिक शाळांमधील मुख्याध्यापक, शिक्षक, शिक्षकेतर कर्मचारी आणि विद्यार्थ्यांनी पारंपरिक वेशभूषा परिधान करून शाळेत उपस्थित राहावे, असे आवाहन करण्यात आले आहे.
विशेष म्हणजे, या दिवशी शाळांच्या नियमित वेळापत्रकात कोणताही बदल करण्यात येणार नसून, दैनंदिन अध्यापनाचे कामकाज नेहमीप्रमाणे सुरू राहणार आहे. पारंपरिक वेशभूषेत सहभागी झालेल्या विद्यार्थ्यांच्या छायाचित्रांसह शाळेचे नाव नमूद करून ते संबंधित तालुक्याच्या व्हॉट्सॲप ग्रुपवर पाठविण्याच्या सूचनाही देण्यात आल्या आहेत.
