
कोल्हापूर : प्रतिनिधी
कोल्हापूरच्या सहकार आणि राजकीय क्षेत्रात महत्त्वाचे स्थान असलेल्या गोकुळ दूध संघाच्या निवडणुकीनंतर आता सत्ताकारणावरून राजकीय वातावरण चांगलेच तापले आहे. महायुतीने गोकुळवर वर्चस्व मिळवल्याचा दावा केला जात असला, तरी या प्रक्रियेत भाजपमधील अंतर्गत नाराजी आणि स्थानिक नेतृत्वाची अस्वस्थता उघड झाल्याची चर्चा राजकीय वर्तुळात रंगली आहे. महाडिकांना गोकुळच्या सत्ताकारणातून बाजूला ठेवले जात आहे का? चंद्रकांत पाटील आणि हसन मुश्रीफ यांच्या राजकीय रणनीतीमुळे भाजपचे स्थानिक नेतृत्व अडचणीत आले आहे का, असे प्रश्न उपस्थित होत आहेत.
महाडिकांचे तीन दशकांचे वर्चस्व; शौमिका महाडिकांचा पराभव चर्चेत
गोकुळच्या राजकारणावर महादेवराव तथा आप्पा महाडिक आणि त्यांच्या सहकाऱ्यांचे तब्बल तीन दशके वर्चस्व होते. मात्र, २०२१ मध्ये सत्तेची समीकरणे बदलली आणि राजश्री शाहू आघाडीने सत्ता मिळवली. त्यानंतर शौमिका महाडिक यांनी पाच वर्षे गोकुळच्या कारभारावर आक्रमकपणे टीका करत विरोधकांची भूमिका बजावली. दूध संकलन, टँकर व्यवहार आणि आर्थिक अनियमिततेच्या मुद्द्यांवर त्यांनी सत्ताधाऱ्यांना धारेवर धरले.
मात्र, अलीकडील निवडणुकीत त्यांचा अवघ्या १२१ मतांनी झालेला पराभव हा महाडिक गटासाठी आणि भाजपसाठी मोठा राजकीय धक्का मानला जात आहे.
स्वीकृत संचालकपदाची चर्चा फोल?
निवडणुकीनंतर शौमिका महाडिक यांचे राजकीय पुनर्वसन होणार आणि स्वीकृत संचालक म्हणून त्यांना गोकुळमध्ये संधी मिळणार, अशी चर्चा सुरू होती. मात्र, प्रत्यक्षात त्यांच्या नावाची घोषणा न झाल्याने या चर्चांना पूर्णविराम मिळाला. यामुळे महाडिक समर्थकांमध्ये नाराजी असल्याचे बोलले जात आहे.
चंद्रकांत पाटील-मुश्रीफांच्या रणनीतीची चर्चा
गोकुळमधील निर्णयप्रक्रियेत मंत्री चंद्रकांत पाटील आणि राष्ट्रवादी काँग्रेसचे नेते हसन मुश्रीफ यांची भूमिका महत्त्वाची ठरल्याची चर्चा आहे. मात्र, स्थानिक भाजप नेते आणि अपक्ष आमदार शिवाजीराव पाटील यांच्यासह काही घटकांमध्ये निर्णय घेताना स्थानिक नेतृत्वाला विश्वासात घेतले गेले नसल्याची भावना असल्याचे सांगितले जाते.
महायुतीने १२ जागा जिंकल्या असल्या, तरी भाजपच्या वाट्याला केवळ दोन जागा आल्याने पक्षाच्या स्थानिक कार्यकर्त्यांमध्ये अस्वस्थता निर्माण झाल्याची चर्चा आहे. सत्ता महायुतीची, पण राजकीय लाभ मित्रपक्षांना आणि भाजपच्या स्थानिक नेतृत्वाला मर्यादित संधी, अशी भावना कार्यकर्त्यांमध्ये व्यक्त होत आहे.
भाजपसमोर आत्मपरीक्षणाचे आव्हान!
सहकार क्षेत्रात पक्षाचे संघटन मजबूत करणे आणि वर्षानुवर्षे पक्षासाठी काम करणाऱ्या स्थानिक नेत्यांना योग्य स्थान देणे, ही भाजपसमोरील दुहेरी कसरत ठरत आहे. शौमिका महाडिक यांच्यासारख्या आक्रमक चेहऱ्याला अपेक्षित संधी न मिळाल्याने सहकार क्षेत्रातील भाजपच्या नेतृत्वाबाबत प्रश्न उपस्थित होत आहेत.
एकीकडे गोकुळवरील सत्तेचे समीकरण महायुतीच्या बाजूने गेले असले, तरी दुसरीकडे भाजपमधील अंतर्गत नाराजीचे चित्र समोर येत आहे. त्यामुळे गोकुळ जिंकण्याच्या राजकीय रणनीतीत भाजपने आपल्याच स्थानिक ताकदीच्या नेत्यांना दुखावले का, हा प्रश्न आता ऐरणीवर आला आहे.
गोकुळची सत्ता महायुतीकडे आली; पण या सत्ताकारणातून भाजपची स्थानिक ताकद वाढली की अंतर्गत नाराजी? याचे उत्तर आगामी राजकीय घडामोडींमधून स्पष्ट होणार आहे.










