कोल्हापूर (प्रतिनिधी) :
उदय साळुंखे
हिंदुहृदयसम्राट शिवसेनाप्रमुख स्व. बाळासाहेब ठाकरे यांच्या १४ व्या स्मृतिदिनानिमित्त करवीर तालुका शिवसेनेच्या वतीने त्यांना विनम्र अभिवादन करण्यात आले. शिवसेना शाखा क्रमांक ३ मधील बाल हनुमान मित्र मंडळाच्या हॉलमध्ये आयोजित या कार्यक्रमात करवीर तालुकाप्रमुख राजू यादव यांच्या हस्ते बाळासाहेबांच्या प्रतिमेस पुष्पहार अर्पण करण्यात आला. यावेळी “अमर रहे, अमर रहे, बाळासाहेब अमर रहे” आणि “परत या, परत या, बाळासाहेब परत या” अशा गगनभेदी घोषणांनी शिवसैनिकांनी संपूर्ण परिसर दणाणून सोडला.
याप्रसंगी भावना व्यक्त करताना तालुकाप्रमुख राजू यादव म्हणाले की, “आम्हा शिवसैनिकांचे दैवत, युगपुरुष, जागतिक कीर्तीचे व्यंगचित्रकार, मराठी मनाचे मानबिंदू आणि हिंदुस्थानचे महानेते वंदनीय बाळासाहेब ठाकरे यांच्या १४ व्या स्मृतिदिनानिमित्त करवीर तालुका शिवसेनेच्या वतीने आम्ही त्यांच्या पवित्र स्मृतीस विनम्र अभिवादन करतो.”
या अभिवादन सभेस करवीर तालुकाप्रमुख राजू यादव यांच्यासह बाळासाहेब नलवडे, दीपक पाटील, संतोष चौगुले, विक्रम चौगुले, अरविंद शिंदे, योगेश लोहार, सचिन नागटिळक, शरद माळी, सागर पाटील, दत्ता फराकटे, प्रकाश मुदुगडे, अक्षय परीट, रामराव पाटील, नितीन निकम, धनंजय पाटील, अजित चव्हाण आदी पदाधिकारी व शिवसैनिक मोठ्या संख्येने उपस्थित होते.










