रायबाग, प्रतिनिधी : भारताला कायमस्वरूपी पोलिओमुक्त ठेवण्यासाठी प्रत्येक पालकाने आपल्या पाच वर्षांखालील मुलांना न चुकता पल्स पोलिओचे थेंब द्यावेत, असे आवाहन आमदार डी.एम. इहोळे यांनी केले.
रविवारी रायबाग येथील सार्वजनिक रुग्णालयात आयोजित पल्स पोलिओ लसीकरण कार्यक्रमाच्या शुभारंभप्रसंगी ते बोलत होते. यावेळी त्यांनी मुलांचे आरोग्य ही देशाची अमूल्य संपत्ती असल्याचे सांगत पोलिओसारख्या घातक आजाराचे समूळ उच्चाटन करण्यासाठी सर्वांनी आरोग्य विभागाला सहकार्य करण्याचे आवाहन केले.
सार्वजनिक रुग्णालयाच्या मुख्य वैद्यकीय अधिकारी डॉ. विनोदा गस्ती यांनी माहिती देताना सांगितले की, पल्स पोलिओ लसीकरण मोहीम आजपासून १ जुलैपर्यंत तालुक्यातील सर्व लसीकरण केंद्रांवर राबविण्यात येणार आहे. पाच वर्षांखालील एकही बालक लसीकरणापासून वंचित राहू नये, यासाठी पालकांनी पुढाकार घ्यावा, असे त्यांनी नमूद केले.
तालुक्यात पाच वर्षांखालील ४७ हजार ५३३ बालके असून, लसीकरण मोहिमेसाठी २१७ बूथ उभारण्यात आले आहेत. यासाठी ५३ पर्यवेक्षक, ४३० पथके आणि ८६८ लसीकरणकर्ते कार्यरत असल्याची माहिती त्यांनी दिली.
यावेळी तहसीलदार महादेव सनमुरी, डॉ. एस.एस. कारगवे, डॉ. महंथप्पा माळी, नंदकुमार पाटील, शोभा संकन्नवर, श्रीशैल होसूर, पुष्पा भोसले, डी.एन. हल्ली तसेच रुग्णालयातील कर्मचारी आणि पालक मोठ्या संख्येने उपस्थित होते.
