चंदगड प्रतिनिधी – कुरणी : कुरणी-धामापूर-नांदूरे ग्रामपंचायतीच्या ग्रामसभेत झालेल्या गदारोळाच्या पार्श्वभूमीवर सरपंच व सदस्य मंडळाने पत्रकार परिषद घेऊन आपली भूमिका स्पष्ट केली. ग्रामसभेचे कामकाज सुरळीत सुरू असताना काही व्यक्तींनी गोंधळ घालून ग्रामपंचायतीच्या कामकाजात अडथळा निर्माण करण्याचा प्रयत्न केला. अशा प्रकारे ग्रामसभेचे वातावरण बिघडविणाऱ्या व्यक्तींवर नियमानुसार कारवाई करण्यात येणार असल्याचा इशारा सरपंच संतोष मोरे यांनी दिला.
ग्रामसभेत ग्रामस्थांना विविध प्रश्न मांडण्याचा पूर्ण अधिकार आहे. त्यामुळे ग्रामस्थांनी उपस्थित केलेल्या प्रश्नांवर ग्रामपंचायत प्रशासनाकडून योग्य ती माहिती देण्यात येत असल्याचे सरपंचांनी सांगितले. मात्र, प्रश्न मांडण्याच्या नावाखाली जाणीवपूर्वक गोंधळ घालणे, ग्रामसभेच्या कामकाजात अडथळा आणणे तसेच सरपंच, उपसरपंच आणि सदस्य मंडळावर वैयक्तिक आरोप करणे योग्य नसल्याचे त्यांनी स्पष्ट केले.
ग्रामसभा सुरू होण्यापूर्वी उपस्थित मतदारांच्या स्वाक्षऱ्या घेण्याची प्रक्रिया करण्यात आली होती. ग्रामसभेच्या कामकाजासाठी आवश्यक असलेल्या प्रक्रियेनुसार उपस्थिती नोंदविण्यात आली. त्यानंतर ग्रामसभा सुरू करून ग्रामस्थांना आपले प्रश्न मांडण्याची संधी देण्यात आली. मात्र, काही व्यक्तींनी या प्रक्रियेचा विपर्यास करून ग्रामपंचायतीविरोधात वातावरण निर्माण करण्याचा प्रयत्न केल्याचा आरोप सरपंच मंडळाने केला.
*अडीच वर्षांत विविध विकासकामे*
ग्रामपंचायतीच्या मागील अडीच वर्षांच्या कार्यकाळात गावातील विविध विकासकामे करण्यात आली असून, ग्रामपंचायतीचा कारभार पारदर्शक पद्धतीने सुरू असल्याचे सरपंच संतोष मोरे यांनी सांगितले. ग्रामपंचायतीच्या निधीचा गैरवापर केल्याचे किंवा पदाधिकाऱ्यांनी आर्थिक गैरव्यवहार केल्याचे आरोप चुकीचे व निराधार असल्याचा दावा त्यांनी केला.
ग्रामपंचायतीच्या कामकाजाबाबत कोणत्याही ग्रामस्थाला शंका किंवा आक्षेप असल्यास त्यांनी अधिकृत कागदपत्रांच्या आधारे प्रश्न उपस्थित करावेत. ग्रामपंचायत त्यांना नियमानुसार माहिती देण्यास तयार आहे. मात्र, कोणताही ठोस पुरावा नसताना आरोप करून ग्रामपंचायतीची व पदाधिकाऱ्यांची बदनामी करण्याचा प्रयत्न केल्यास तो खपवून घेतला जाणार नाही, असेही सरपंचांनी स्पष्ट केले.
*शिपाई भरती प्रक्रियेबाबत स्पष्टीकरण*
ग्रामपंचायतीच्या शिपाई पदाच्या भरतीबाबत ग्रामसभेत प्रश्न उपस्थित करण्यात आले होते. याबाबत ग्रामपंचायत मंडळाने स्पष्ट केले की, ग्रामपंचायत ही स्थानिक स्वराज्य संस्थेचा भाग असून ग्रामपंचायतीच्या आस्थापनेवरील कर्मचाऱ्यांच्या नियुक्तीची प्रक्रिया संबंधित कायदे व नियमांनुसार राबविण्यात येते.
शिपाई पदासाठी पात्र उमेदवारांची गुणवत्ता तपासण्यासाठी योग्य निवड प्रक्रिया राबविण्याचा निर्णय घेण्यात आला आहे. आवश्यकतेनुसार लेखी परीक्षा व इतर निकषांचा विचार करून पारदर्शक पद्धतीने भरती प्रक्रिया करण्याचा ग्रामपंचायत सदस्य मंडळाचा प्रयत्न आहे.त्याप्रमाणे शिपाई भरती करणात आली.कोणत्याही व्यक्तीला वैयक्तिक फायदा मिळावा या उद्देशाने प्रक्रिया केली जात नसल्याचेही यावेळी स्पष्ट करण्यात आले.
*सरपंच, उपसरपंच व सदस्यांना मानसिक त्रास देण्याचा आरोप*
ग्रामपंचायतीच्या कामकाजावर आरोप करताना सरपंच संतोष मोरे, उपसरपंच खवणेवाडकर तसेच सदस्य मंडळाला लक्ष्य केले जात असून, यामुळे पदाधिकाऱ्यांना मानसिक त्रास सहन करावा लागत असल्याचे पत्रकार परिषदेत सांगण्यात आले. ग्रामपंचायतीच्या विकासकामांवर टीका करण्याचा अधिकार प्रत्येक ग्रामस्थाला आहे; मात्र वैयक्तिक बदनामी अथवा जाणीवपूर्वक गोंधळ निर्माण करणे योग्य नसल्याचे पदाधिकाऱ्यांनी नमूद केले.
यापुढे ग्रामसभेत शिस्तभंग करणाऱ्या, कामकाजात अडथळा आणणाऱ्या किंवा जाणीवपूर्वक गोंधळ घालणाऱ्या व्यक्तींवर उपलब्ध नियमांनुसार योग्य ती कारवाई करण्याची भूमिका ग्रामपंचायतीने घेतली आहे.
ग्रामसभेतील प्रत्येक प्रश्नाचे उत्तर देण्यास ग्रामपंचायत तयार असून, विकासकामे, निधी आणि आर्थिक व्यवहार याबाबत आवश्यक ती माहिती ग्रामस्थांसमोर ठेवली जाईल. गावाच्या विकासासाठी सर्व ग्रामस्थांनी सहकार्य करावे आणि ग्रामसभेचे कामकाज शांततेत व लोकशाही पद्धतीने पार पाडण्यास सहकार्य करावे, असे आवाहन सरपंच संतोष मोरे यांनी केले.
यावेळी सरपंच संतोष मोरे, उपसरपंच खवणेवाडकर,ग्रामसेवक सदस्य अनंत केरकर,सुशील पोटफोडे यांच्यासह महिला सदस्य तसेच पदाधिकारी उपस्थित होते.
