रायबाग प्रतिनिधी : विधानसभा आणि संसदेच्या कामकाजाची माहिती विद्यार्थ्यांना व्हावी, तसेच लोकशाही व्यवस्थेबाबत जनजागृती व्हावी, या उद्देशाने शासनाच्या निर्देशानुसार युवा संसद कार्यक्रम सुरू करण्यात आला आहे, अशी माहिती समाजकल्याण विभागाचे सहाय्यक संचालक विठ्ठल चंद्रगी यांनी दिली.
आंतरराष्ट्रीय लोकशाही दिनानिमित्त शुक्रवारी नगर येथील डॉ. बाबू जगजीवनराम सभागृहात समाजकल्याण विभाग, तालुका प्रशासन तसेच कायदा व मानवाधिकार विभाग यांच्या संयुक्त विद्यमाने तालुकास्तरीय युवा संसद कार्यक्रमाचे आयोजन करण्यात आले होते. या कार्यक्रमाच्या उद्घाटनप्रसंगी चंद्रगी बोलत होते.
भारत हा लोकशाहीप्रधान देश असून, देशातील मतदार मतदानाच्या माध्यमातून आपले लोकप्रतिनिधी निवडून संसदेत पाठवतात. लोकशाही व्यवस्थेत संसदेला अनन्यसाधारण महत्त्व आहे. त्यामुळे विद्यार्थ्यांना संसदेच्या कामकाजाची प्रक्रिया समजावी, त्यांच्यामध्ये लोकशाही मूल्यांची जाणीव निर्माण व्हावी आणि संसदीय कार्यपद्धतीची माहिती मिळावी, यासाठी युवा संसद कार्यक्रम महत्त्वपूर्ण ठरत असल्याचे त्यांनी सांगितले.
या कार्यक्रमात तालुक्यातील विविध शाळा, महाविद्यालये आणि विधी महाविद्यालयांतील विद्यार्थ्यांनी सहभाग घेतला. विद्यार्थ्यांनी सत्ताधारी पक्ष आणि विरोधी पक्षाच्या सदस्यांच्या भूमिका प्रभावीपणे साकारत संसदेच्या कामकाजाचे प्रात्यक्षिक सादर केले. प्रत्यक्ष संसदेत चालणाऱ्या चर्चेप्रमाणेच विद्यार्थ्यांनी प्रश्न उपस्थित केले, त्यावर उत्तरे मागितली आणि विविध विषयांवर आपली मते मांडली.
प्रश्नोत्तर आणि शून्य तासाच्या सत्राने विशेष लक्ष वेधले. सत्ताधारी पक्षाकडून देण्यात आलेल्या उत्तरांवर विरोधी पक्षातील विद्यार्थ्यांचे समाधान न झाल्याने त्यांनी सभागृहाच्या विहिरीत उतरून सरकारविरोधात जोरदार घोषणाबाजी केली. त्यामुळे सभागृहात काही काळ गोंधळाचे वातावरण निर्माण झाले. परिणामी, सभागृहाचे कामकाज काही काळासाठी तहकूब करण्यात आले. विद्यार्थ्यांनी संसदेतील प्रत्यक्ष कामकाजाची शैली प्रभावीपणे साकारल्याने उपस्थितांचे लक्ष वेधले गेले.
या उपक्रमामुळे विद्यार्थ्यांना लोकशाही व्यवस्था, संसदीय परंपरा, प्रश्नोत्तराचा तास, शून्य तास, सत्ताधारी व विरोधी पक्षांची भूमिका तसेच सभागृहातील शिस्त यांची प्रत्यक्ष माहिती मिळाली. विद्यार्थ्यांमध्ये नेतृत्वगुण, वक्तृत्वकला, चिकित्सक विचार आणि सार्वजनिक प्रश्नांवर चर्चा करण्याची क्षमता विकसित होण्यास अशा कार्यक्रमांची मदत होते.
या कार्यक्रमाला तहसीलदार महादेव सनमुरी, एम.एम. दप्पिन, सहाय्यक कृषी संचालक विनोद मावरकर, गटशिक्षणाधिकारी बसवराजप्पा आर., हेस्कॉमचे सहाय्यक कार्यकारी अभियंता वाय.एस. सनमणी, मागासवर्गीय कल्याण विभागाच्या अधिकारी कल्पना कांबळे, बार असोसिएशनच्या अध्यक्षा के.आर. कोतीवाले, विधी महाविद्यालयाच्या प्राचार्या सुनीता कुराबेट, अधिवक्ता डी.एच. यल्लट्टी, आर.एस. गुडोदगी, अंबरीश कांबळे, प्रितेश भिर्डी यांच्यासह तालुक्यातील विविध शाळा व महाविद्यालयांचे विद्यार्थी उपस्थित होते.
