चंदगड : प्रतिनिधी, संजय आगाशे,
देशसेवेचे कर्तव्य बजावत असताना अमृतसर (पंजाब) येथे निधन झालेले इनाम म्हाळुंगे (ता. चंदगड) येथील सुपुत्र व सैन्यदलातील हवालदार नामदेव आनंदा गावडे (वय ३८) यांच्यावर रविवारी दुपारी शासकीय इतमामात अंत्यसंस्कार करण्यात आले. वीर जवानाच्या पार्थिवाला अखेरचा निरोप देण्यासाठी हजारो नागरिकांनी उपस्थित राहून श्रद्धांजली अर्पण केली.
हवालदार नामदेव गावडे यांचे गुरुवारी (दि. २०) अमृतसर येथे निधन झाले होते. अमृतसरहून विमानाने त्यांचे पार्थिव पुणे येथे आणण्यात आले. त्यानंतर रुग्णवाहिकेद्वारे रविवारी त्यांचे पार्थिव इनाम म्हाळुंगे येथे आणण्यात आले. दुपारी दोन वाजता गावातून त्यांच्या पार्थिवाची अंत्ययात्रा काढण्यात आली.
वीर जवानाच्या अंत्ययात्रेसाठी ट्रॅक्टर-ट्रॉली आकर्षक पद्धतीने सजविण्यात आली होती. गावातील प्रत्येक घरासमोर पार्थिवाचे औक्षण करून ग्रामस्थांनी वीर जवानाला भावपूर्ण श्रद्धांजली वाहिली. ‘नामदेव गावडे अमर रहे’, ‘भारत माता की जय’ अशा देशभक्तीपर घोषणांनी संपूर्ण परिसर दुमदुमून गेला.
आपल्या गावातील जवानाने देशाच्या रक्षणासाठी दिलेल्या बलिदानाचा अभिमान आणि लाडक्या जवानाच्या जाण्याचे दुःख अशा संमिश्र भावनांनी प्रत्येकाचे डोळे पाणावले होते. सैन्यदलात कार्यरत राहून देशाच्या संरक्षणासाठी कर्तव्य बजावत असलेल्या हवालदार नामदेव गावडे यांच्या निधनाने संपूर्ण चंदगड तालुक्यावर शोककळा पसरली आहे.
देशाच्या सीमेचे रक्षण करणाऱ्या जवानांचा त्याग आणि योगदान किती अनमोल असते, याची जाणीव करून देणारा हा प्रसंग ठरला. देशसेवेत असताना प्राणांची आहुती देणाऱ्या या वीर जवानाला ग्रामस्थांनी राष्ट्रभक्तीच्या वातावरणात अखेरचा निरोप दिला. हवालदार नामदेव गावडे यांचे बलिदान चंदगडच्या मातीत आणि ग्रामस्थांच्या स्मरणात सदैव जिवंत राहील. त्यांच्या त्यागातून पुढील पिढ्यांना देशप्रेम, कर्तव्यनिष्ठा आणि राष्ट्रसेवेची प्रेरणा मिळत राहील.
अंत्यसंस्कारावेळी गोपाळराव पाटील, सभापती विलास नाईक, निखिल पाटील, भारती पाटील, नामदेव पाटील, सचिन बल्लाळ, पंचायत समिती सदस्या मनस्विनी कांबळे यांच्यासह विविध क्षेत्रांतील मान्यवर आणि मोठ्या संख्येने ग्रामस्थ उपस्थित होते. मान्यवरांनी पुष्पचक्र अर्पण करून हवालदार नामदेव गावडे यांना भावपूर्ण श्रद्धांजली वाहिली.
हवालदार नामदेव गावडे यांच्या पश्चात पत्नी, मुलगा, मुलगी, आई, वडील, भाऊ आणि बहीण असा परिवार आहे. त्यांच्या निधनाने गावडे कुटुंबावर दुःखाचा डोंगर कोसळला असून संपूर्ण परिसरातून कुटुंबीयांप्रती शोकसंवेदना व्यक्त करण्यात येत आहेत.
‘शहीद जवान अमर रहे’ या घोषणांनी आणि अश्रुपूर्ण वातावरणात वीर जवानाला चंदगड तालुक्याने अखेरचा निरोप दिला.
