गांधीनगर/प्रतिनिधी
भारताच्या ८०व्या स्वातंत्र्यदिनानिमित्त तसेच सालाबादप्रमाणे सिंधी समाजाच्या वतीने, स्वामी देवप्रकाश महाराज यांच्या आशीर्वादाने गांधीनगर येथील सिंधी सेंटर पंचायत येथे भव्य रक्तदान शिबिराचे आयोजन करण्यात आले. सामाजिक बांधिलकी जपत आयोजित करण्यात आलेल्या या रक्तदान शिबिराला नागरिकांचा उत्स्फूर्त प्रतिसाद मिळाला. तब्बल ७०२ रक्तदात्यांनी रक्तदान करून या सामाजिक उपक्रमाला मोठे योगदान दिले.
या शिबिरामध्ये सिंधी समाजातील युवा वर्गासह महिला वर्गानेही मोठ्या संख्येने सहभाग नोंदवला. व्यापारी, अधिकारी, सामाजिक कार्यकर्ते तसेच विविध क्षेत्रातील नागरिकांनी उत्स्फूर्तपणे रक्तदान करत समाजाप्रती असलेली आपली सामाजिक बांधिलकी जपली.
विशेष म्हणजे सहाय्यक पोलीस निरीक्षक अतुल कदम यांनीही यावेळी रक्तदान करून नागरिकांना सामाजिक कार्यात सहभागी होण्याचे आवाहन केले. रक्तदान केल्यानंतर त्यांनी “रक्तदान हेच जीवनदान” असा संदेश देत रक्तदानाचे महत्त्व अधोरेखित केले. या भव्य रक्तदान शिबिरासाठी एकाच वेळी पाच रक्तपेढ्यांच्या माध्यमातून रक्तसंकलनाची व्यवस्था करण्यात आली होती. यामध्ये प्रमिला राजे रुग्णालय (सीपीआर), कोल्हापूर अर्बन ब्लड बँक, शाहू ब्लड बँक, डी. वाय. पाटील ब्लड बँक आणि वैभव लक्ष्मी ब्लड बँक यांचा सहभाग होता. पाचही रक्तपेढ्यांच्या सहकार्यामुळे मोठ्या प्रमाणात रक्तसंकलन करण्यात आले.
सिंधी समाजाच्या वतीने दरवर्षी स्वातंत्र्यदिनाच्या निमित्ताने रक्तदान शिबिराचे आयोजन केले जाते. यंदाही हा उपक्रम अधिक व्यापक स्वरूपात राबविण्यात आला. “रक्तदान हे केवळ सामाजिक कर्तव्य नसून एखाद्याचे प्राण वाचविण्याचे महत्त्वपूर्ण कार्य आहे,” या भावनेतून समाजातील नागरिकांनी मोठ्या उत्साहाने रक्तदान केले.
या उपक्रमातून समाजातील युवक व महिलांसह सर्वच घटकांनी सामाजिक कार्यात पुढाकार घेण्याचा आदर्श निर्माण केला. स्वातंत्र्यदिनाचा उत्सव केवळ ध्वजारोहणापुरता मर्यादित न ठेवता रक्तदानाच्या माध्यमातून समाजसेवेचा संदेश देत सिंधी समाजाने सामाजिक बांधिलकीची अनोखी परंपरा कायम राखली.
७०२ रक्तदात्यांच्या उत्स्फूर्त सहभागामुळे यंदाचे रक्तदान शिबिर विशेष उल्लेखनीय ठरले असून, या उपक्रमाचे नागरिकांकडून कौतुक होत आहे.
