डॉ शिवाजी शिंदे
जिल्हा प्रतिनिधी परभणी.
सेलू : सेलू–परभणी मार्गावरील सिमेंट काँक्रीट रस्त्यालगत सुरू असलेल्या वृक्षारोपण उपक्रमाचे स्वागत केले तसेच, कृषी उत्पन्न बाजार समिती, सेलूचे सभापती डॉ. संजय रोडगे यांनी सार्वजनिक बांधकाम विभागाला महत्त्वपूर्ण सूचना लेखी स्वरूपात केली आहे.
डॉ. रोडगे यांनी म्हटले आहे की, पर्यावरण संवर्धनासाठी मोठ्या प्रमाणावर वृक्षारोपण होणे आवश्यक असले तरी भविष्यात या रस्त्याचे चार पदरी किंवा अन्य स्वरूपात रुंदीकरण होण्याची शक्यता लक्षात घेऊन झाडे योग्य अंतरावर व नियोजनपूर्वक लावणे गरजेचे आहे. कमी अंतरावर लावलेली झाडे भविष्यात विकासकामांना अडथळा ठरू शकतात आणि ती तोडावी लागल्यास पर्यावरणासह शासनाच्या निधीचेही नुकसान होईल.
यासाठी सार्वजनिक बांधकाम विभागाने तांत्रिक निकषांनुसार व भविष्यातील विकास आराखडा लक्षात घेऊन वृक्षारोपणाचे नियोजन करावे, अशी मागणी डॉ. रोडगे यांनी केली असून यासंदर्भात कार्यकारी अभियंता, सार्वजनिक बांधकाम विभाग, परभणी यांना निवेदन सादर करण्यात आले आहे.
