जिल्हा प्रतिनिधी : संतोष भालेराव, वाशिम : रिसोड पोलीस स्टेशनच्या पथकाने विशेष कामगिरी करत सन 2016 पासून फरार असलेल्या आरोपीला अटक करण्यात यश मिळविले आहे. तब्बल दहा वर्षांपासून न्यायालयीन प्रक्रियेपासून दूर राहणाऱ्या आरोपीला शोधून त्याच्यावर पुढील कायदेशीर कारवाई करण्यात आली.
पोलीस स्टेशन रिसोड येथे सन 2008 मध्ये भारतीय दंड संहितेच्या कलम 324, 504 व 506 अन्वये गुन्हा दाखल करण्यात आला होता. या गुन्ह्यातील आरोपी एकनाथ झुबर डोंगरे (वय 40, रा. बोरखेडी, ता. रिसोड, जि. वाशिम) हा सन 2016 पासून फरार होता.
रिसोड पोलिसांनी गोपनीय माहितीच्या आधारे 7 जुलै 2026 रोजी आरोपीला ताब्यात घेतले. त्यानंतर त्याला न्यायालयासमोर हजर करण्यात आले असून पुढील कायदेशीर कार्यवाही सुरू करण्यात आली आहे.
ही कारवाई पोलीस अधीक्षक श्री निकेश खतमोडे-पाटील, अपर पोलीस अधीक्षक लता फड मॅडम आणि उपविभागीय पोलीस अधिकारी रामकृष्ण पवार यांच्या मार्गदर्शनाखाली पोलीस निरीक्षक रामेश्वर चव्हाण, पोलीस उपनिरीक्षक वसंत तहकीक, पोहवा शंकर दामोडे, पोलीस कॉन्स्टेबल विनोद जायभाये, हेमंत सरकटे व राजेश गांगवे यांनी केली.
रिसोड पोलिसांच्या या कारवाईमुळे फरार आरोपींविरुद्ध सुरू असलेल्या शोधमोहीमेला आणखी बळ मिळाले असून कायद्यापासून कोणीही सुटू शकत नाही, असा स्पष्ट संदेश या कारवाईतून देण्यात आला आहे.
