सांगली प्रतिनिधी – सांगली जिल्हा मध्यवर्ती सहकारी बँकेची नोकरभरती प्रक्रिया ही राज्य शासनाच्या नियमांनुसार आणि पूर्णपणे पारदर्शक पद्धतीने सुरू असून, या प्रक्रियेत कोणताही गैरव्यवहार नसल्याचा दावा बँकेच्या अध्यक्षांनी केला. नोकरभरतीवरून होत असलेल्या आरोपांना पत्रकार परिषदेत उत्तर देताना त्यांनी विरोधकांवर राजकीय हेतूने अडथळे आणण्याचा आरोप केला.
अध्यक्ष म्हणाले की, शासनाने सुरुवातीला पॅनेलवरील कंपन्यांमार्फत भरती करण्यास परवानगी दिली होती. त्यानंतर नियमांमध्ये बदल करून आयबीपीएस (IBPS) आणि टीसीएस (TCS) या दोन कंपन्यांमार्फत भरती करण्याचे निर्देश दिले. पुढे एमकेसीएल (MKCL) या तिसऱ्या कंपनीचाही समावेश करण्यात आला. 20 मे रोजी झालेल्या संचालक मंडळाच्या बैठकीत आयबीपीएसमार्फत भरती करण्याचा निर्णय एकमताने घेण्यात आला. त्यानंतर विभागीय सहकार कार्यालयाला माहिती देऊन आवश्यक प्रक्रिया पूर्ण करत भरतीची जाहिरात प्रसिद्ध करण्यात आली.
24 जूनपासून ऑनलाइन अर्ज स्वीकारण्यास सुरुवात झाली असून, आतापर्यंत सुमारे 45 हजार उमेदवारांनी अर्ज दाखल केले आहेत. बँकेत सध्या सुमारे 450 कर्मचाऱ्यांची कमतरता असून अनेक शाखांमध्ये केवळ एक लिपिक आणि एक शिपाई कार्यरत असल्याने भरती अत्यावश्यक असल्याचे त्यांनी सांगितले.
ही भरती केवळ गुणवत्ता आणि गुणवत्तेच्या आधारे होणार असून, जिल्ह्यातील 70 टक्के युवक-युवतींना आणि उर्वरित 30 टक्के उमेदवारांना जिल्ह्याबाहेरून संधी दिली जाणार असल्याचेही त्यांनी स्पष्ट केले.
प्रशासक नेमण्याच्या चर्चेवर भाष्य करताना अध्यक्ष म्हणाले की, काही जणांचा उद्देश प्रशासक नेमून भरती प्रक्रियेत हस्तक्षेप करण्याचा असल्याचे दिसत आहे. बँकेच्या ठेवी 10 हजार कोटी, कर्जवाटप 8 हजार कोटी आणि नेट एनपीए शून्य असल्याने बँकेची आर्थिक स्थिती अत्यंत भक्कम असल्याचा दावा त्यांनी केला.
जयंत पाटील यांच्याबाबत करण्यात येणारे आरोप फेटाळून लावताना त्यांनी सांगितले की, बँकेच्या दैनंदिन कामकाजात किंवा कर्जवाटपात जयंत पाटील यांनी कधीही हस्तक्षेप केलेला नाही. ते केवळ विधायक सूचना आणि मार्गदर्शन करत असतात.
वसंतदादा साखर कारखान्याला दिलेल्या कर्जाबाबतही त्यांनी स्पष्टीकरण दिले. कारखान्याची सुमारे एक हजार कोटी रुपयांची मालमत्ता तारण असून, त्याविरुद्ध केवळ 250 कोटी रुपयांचे कर्ज मंजूर करण्यात आले आहे. त्यामुळे सर्व निकषांचे पालन करूनच कर्ज देण्यात आल्याचे त्यांनी सांगितले.
सांगली जिल्हा बँक ही शेतकऱ्यांची बँक असून तिच्या कामकाजात राजकारण करू नये. शेतकऱ्यांच्या हितासाठी आणि बँकेची प्रगती कायम ठेवण्यासाठी संचालक मंडळ एकदिलाने काम करत असल्याचे अध्यक्ष सांगली जिल्हा मध्यवर्ती बँक मा आ. मानसिंगराव नाईक यांनी यावेळी स्पष्ट केले.
