कोल्हापूर प्रतिनिधी : प्रविण केर्ले
कोल्हापूर जिल्हा दूध उत्पादक संघ अर्थात गोकुळच्या अध्यक्षपदाच्या निवडीवरून सुरू असलेल्या राजकीय संघर्षाला आता नवे वळण मिळाले आहे. अध्यक्षपदाच्या निवडणुकीत समविचारी आघाडीने बहुमत मिळवल्यानंतरही महायुतीच्या संचालकांनी कोरमअभावी सभा होऊ न दिल्याने राजकीय वातावरण चांगलेच तापले होते. मात्र, अवघ्या चोवीस तासांत वैद्यकीय शिक्षण मंत्री हसन मुश्रीफ आणि आमदार प्रकाश आबिटकर यांनी पुढील बैठकीला उपस्थित राहण्याची तयारी दर्शविल्याने राजकीय वर्तुळात चर्चांना उधाण आले आहे. ही भूमिका खरोखरच गोकुळच्या हितासाठी घेतलेली सामंजस्याची भूमिका आहे की न्यायालयीन सुनावणी आणि जनतेतील नाराजी लक्षात घेऊन केलेले डॅमेज कंट्रोल, असा प्रश्न उपस्थित होत आहे.
महायुतीच्या संचालकांनी सभेला अनुपस्थित राहिल्यानंतर समविचारी आघाडीचे नेते आमदार सतेज पाटील यांनी न्यायालयात धाव घेतली. या प्रकरणाची पुढील सुनावणी २ नोव्हेंबर रोजी होणार असल्याने गोकुळच्या अध्यक्ष निवडीचा विषय आता न्यायालयीन प्रक्रियेच्या केंद्रस्थानी आला आहे. अशा परिस्थितीत महायुतीच्या नेत्यांनी पुढील बैठकीला उपस्थित राहण्याची तयारी दर्शविल्याने त्यांच्या भूमिकेतील बदलाला राजकीय महत्त्व प्राप्त झाले आहे.
न्यायालयीन प्रक्रियेच्या पार्श्वभूमीवर महायुतीने स्वतःहून सहकार्याची भूमिका घेतल्यास संस्थेच्या कामकाजात अडथळा आणण्याचा आरोप कमी होऊ शकतो. तसेच दूध उत्पादक शेतकऱ्यांच्या हितासाठी आपण राजकारण बाजूला ठेवण्यास तयार आहोत, असा संदेश देण्याची संधीही महायुतीला मिळू शकते. त्यामुळे या भूमिकेकडे राजकीय डॅमेज कंट्रोल म्हणूनही पाहिले जात आहे.
दरम्यान, अध्यक्षपदाच्या निवडीच्या दिवशी निर्माण झालेल्या परिस्थितीचा भावनिक मुद्दाही चर्चेत आला आहे. गोकुळचे संस्थापक आनंदराव पाटील चुयेकर यांच्या पुतळ्याला नवनिर्वाचित अध्यक्षांच्या हस्ते पुष्पहार अर्पण करण्याची परंपरा आहे. यावेळी शशिकांत पाटील चुयेकर यांचे नाव अध्यक्षपदासाठी चर्चेत असताना कोरमअभावी सभा तहकूब झाल्याने हा पुष्पहार बराच काळ तसाच राहिला. या घटनेवरून सहकार क्षेत्रात आणि सोशल मीडियावर विविध प्रतिक्रिया उमटल्या. चुयेकर कुटुंबाचे सहकार क्षेत्रातील योगदान लक्षात घेता या प्रसंगाला भावनिक किनार लाभली.
दुसरीकडे, हसन मुश्रीफ यांनी गोकुळच्या निवडणुकीतील मतांची आकडेवारी मांडत समविचारी आघाडीच्या विजयाचे अंतर आणि महायुतीला मिळालेल्या मतांचा मुद्दा पुढे आणला आहे. यामधून गोकुळच्या राजकारणात महायुतीचेही महत्त्व कायम असल्याचे अधोरेखित करण्याचा प्रयत्न दिसून येतो. तसेच सतेज पाटील यांच्या राजकीय भूमिकेवर आणि कार्यपद्धतीवरही मुश्रीफ यांनी प्रश्न उपस्थित केले. त्याला सतेज पाटील यांनी प्रत्युत्तर दिल्याने दोन्ही बाजूंतील राजकीय आरोप-प्रत्यारोप सुरूच आहेत.
एकीकडे महायुतीकडून सामंजस्याची भूमिका मांडली जात असताना दुसरीकडे गोकुळच्या कारभारावर आणि भविष्यातील धोरणांवर वर्चस्व मिळवण्याची राजकीय स्पर्धा कायम राहण्याची शक्यता आहे. अध्यक्षपदाची निवड प्रक्रिया पूर्ण झाली तरी संस्थेतील राजकीय संघर्ष संपणार नसल्याचे सध्याच्या घडामोडींवरून दिसत आहे.
एकूणच, न्यायालयीन सुनावणी, दूध उत्पादक शेतकऱ्यांमधील भावना आणि आगामी राजकीय समीकरणे या तिन्ही बाबींचा विचार करून महायुतीने आपली भूमिका बदलल्याची चर्चा आहे. त्यामुळे मुश्रीफ आणि आबिटकर यांची ही सामंजस्याची भूमिका प्रत्यक्षात कितपत टिकते आणि पुढील बैठकीत कोणती राजकीय भूमिका घेतली जाते, याकडे संपूर्ण कोल्हापूर जिल्ह्याचे लक्ष लागले आहे.
