जिल्हा प्रतिनिधी : संतोष भालेराव, वाशिम : रिसोड तालुक्यातील दापुरी खुर्द येथे श्री संत गजानन महाराज माऊलीच्या पालखीचे सोमवारी सकाळी सुमारे १० वाजता उत्साहपूर्ण आणि भक्तिमय वातावरणात आगमन झाले. पालखीचे गावकऱ्यांनी जयघोषात स्वागत करून दर्शनाचा लाभ घेतला.
यावेळी पालखीतील वारकरी भाविकांसाठी चहा, पाणी व फराळाची उत्तम व्यवस्था करण्यात आली होती. पालखीचे दर्शन व स्वागत करण्यासाठी पोलीस पाटील खरात, सरपंच नवघरे, उपसरपंच खरात, माजी सरपंच भागवतराव लोखंडे, श्री संत गजानन बाबा मंदिराचे मठाधिपती ह.भ.प. प्रकाश पुरी बाबा, बेदरे, गोपाल लोखंडे यांच्यासह गावातील अनेक मान्यवर व भाविक मोठ्या संख्येने उपस्थित होते.
यावेळी दापुरी खुर्द ग्रामस्थांनी श्री संत गजानन महाराज माऊलीच्या चरणी “यंदा पाऊस वेळेवर व भरपूर पडू दे आणि सर्वांवर कृपादृष्टी राहू दे,” अशी सामूहिक प्रार्थना केली. पालखी आगमनामुळे संपूर्ण गाव भक्तिमय वातावरणात न्हाऊन निघाले.
