प्रतिनिधी – प्रविण केर्ले
कोल्हापूर जिल्ह्यातील प्रतिष्ठेची सहकारी संस्था मानल्या जाणाऱ्या गोकुळ दूध संघाच्या अध्यक्षपदाच्या निवडणुकीत मोठी राजकीय घडामोड घडली आहे. अध्यक्षपदाच्या निवडीसाठी आयोजित सभा तहकूब करण्यात आल्यानंतरही समविचारी आघाडीने शशिकांत पाटील-चुयेकर यांची अध्यक्षपदी निवड झाल्याचा दावा केला आहे. या अनपेक्षित घडामोडीमुळे कोल्हापूरच्या राजकीय व सहकारी वर्तुळात खळबळ उडाली आहे.
गोकुळ दूध संघ हा केवळ कोल्हापूर जिल्ह्याचाच नव्हे, तर राज्याच्या सहकार क्षेत्रातील महत्त्वाचा आणि आर्थिकदृष्ट्या भक्कम दुग्ध व्यवसाय प्रकल्प आहे. त्यामुळे या संघाच्या अध्यक्षपदाकडे अनेक राजकीय गटांचे लक्ष लागले होते. नियोजित कार्यक्रमानुसार अध्यक्षपदाच्या निवडीसाठी सभा बोलावण्यात आली होती; मात्र सभेच्या सुरुवातीलाच तणावाचे वातावरण असल्याचे दिसून आले. काही कारणास्तव ही सभा अधिकृतरीत्या तहकूब असल्याचे जाहीर करण्यात आले.
सभा तहकूब झाल्यानंतर समविचारी आघाडीने आपले संख्याबळ दाखवून शशिकांत पाटील-चुयेकर यांच्या अध्यक्षपदाची घोषणा केली. मात्र अधिकृत कामकाज थांबलेल्या अवस्थेत झालेल्या या निवडीला प्रशासकीय मान्यता मिळणार का, तसेच सहकार विभाग या प्रक्रियेवर आक्षेप नोंदवणार का, हा मुद्दा चर्चेचा ठरला आहे.
दरम्यान, या सत्तासंघर्षाचा संस्थेच्या दैनंदिन कामकाजावर आणि दूध उत्पादक शेतकऱ्यांच्या बिलांवर विपरीत परिणाम होऊ नये, अशी अपेक्षा व्यक्त होत आहे. गोकुळ ही शेतकऱ्यांची महत्त्वाची संस्था असल्याने तिच्या कारभारात पारदर्शकता आणि लोकशाही प्रक्रिया राहावी, अशी सामान्य सभासदांची भावना आहे. या प्रकरणात पुढील दिशा दोन्ही गटांचे दावे-प्रतिदावे आणि सहकार विभागाच्या निर्णयावर अवलंबून राहणार आहे.
