कोल्हापूर प्रतिनिधी – मौजे शिंगणापूर येथे नदीत पोहत असताना बुडालेल्या सहा वर्षीय चिमुकल्याचा मृतदेह जिल्हा आपत्ती व्यवस्थापन विभागाच्या पथकाने दोन तासांच्या अथक प्रयत्नांनंतर बाहेर काढला. या दुर्दैवी घटनेमुळे परिसरात हळहळ व्यक्त होत आहे.
मिळालेल्या माहितीनुसार, मानस गणेश कांबळे (वय ६) हा गुरुवारी सकाळी सुमारे ८ वाजण्याच्या सुमारास आपल्या वडिलांसोबत नदीवर पोहण्यासाठी गेला होता. यावेळी तो पाण्यात बुडाल्याची घटना घडली. घटनेची माहिती मिळताच जिल्हा आपत्ती व्यवस्थापन विभागाचे पथक तात्काळ घटनास्थळी दाखल झाले.
पथकाने नदी परिसरात शोधमोहीम सुरू करून सलग दोन तास अथक प्रयत्न केले. अखेर मुलाचा मृतदेह पाण्याबाहेर काढण्यात यश आले. त्यानंतर मृतदेह पुढील उत्तरीय तपासणीसाठी पोलिसांच्या ताब्यात देण्यात आला.
या बचाव व शोध मोहिमेत कृष्णात सोरटे, शैलेश हांडे, प्रीतम केसरकर, प्रथमेश येरुडकर, आदिनाथ कांबळे, अविराज बलुगडे, शुभम म्हाडगूत, सुदेश चव्हाण, अविनाश चरापले तसेच कोल्हापूर महानगरपालिका अग्निशामक दलाच्या जवानांनी मोलाची कामगिरी बजावली.
या घटनेमुळे शिंगणापूर परिसरात शोककळा पसरली आहे.
