कोल्हापूर प्रतिनिधी प्रविण केर्ले :
कोल्हापूर जिल्ह्यातील दूध उत्पादक शेतकऱ्यांच्या हिताचा आणि गोकुळ दूध संघातील लोकशाही प्रक्रियेचा मुद्दा उपस्थित करत आमदार सतेज ऊर्फ बंटी डी. पाटील यांनी राज्यातील सर्व संपादक आणि पत्रकारांना खुले पत्र लिहिले आहे. गोकुळमधील सध्याच्या घडामोडींवर लोकशाहीच्या रक्षणासाठी पत्रकारांनी आवाज उठवावा, अशी कळकळीची विनंती त्यांनी केली आहे.
पत्रात सतेज पाटील यांनी गोकुळच्या निवडणुकीचा संदर्भ देत म्हटले आहे की, कोल्हापूर जिल्ह्यातील सुमारे दीड लाख दूध उत्पादक शेतकऱ्यांनी गोकुळच्या निवडणुकीत २५ पैकी १३ जागांवर समविचारी आघाडीला स्पष्ट बहुमत दिले. मात्र, २९ ऑक्टोबर रोजी झालेल्या अध्यक्ष निवडीच्या सभेला महायुतीचे सर्व १२ संचालक गैरहजर राहिल्याने गणपूर्तीच्या तांत्रिक कारणावरून सभा तहकूब झाली. त्यामुळे निवड प्रक्रियेवर प्रश्नचिन्ह निर्माण झाल्याचे त्यांनी नमूद केले आहे.
