विशाल क्रांती प्रतिनिधी – प्रविण केर्ले,
कोल्हापूरच्या राजकारणात एक म्हण कायमच गाजते, “आमदारकी नको, पण गोकुळचा संचालक करा!” तब्बल ४००० कोटींच्या घरात वार्षिक उलाढाल असणाऱ्या कोल्हापूर जिल्हा सहकारी दूध संघ अर्थात ‘गोकुळ’च्या सत्तेच्या चाव्या कुणाकडे जाणार, याचा थरार आता शिगेला पोहोचला आहे. राज्यातील भीषण दुष्काळाच्या पार्श्वभूमीवर गोकुळची निवडणूक बिनविरोध होणार, अशा अफवा कोल्हापूरच्या राजकीय वर्तुळात जाणीवपूर्वक पेरल्या जात होत्या. मात्र, या सर्व वावड्यांवर पाणी फेरत सतेज उर्फ बंटी पाटील यांनी कोणत्याही परिस्थितीत निवडणूक होणारच, असा ठाम पवित्रा घेत आपला पहिला राजकीय शड्डू ठोकला आहे. सतीश पाटलांनी समविचारी पक्षांना सोबत घेऊन ‘राजर्षी शाहू शेतकरी समविचारी आघाडी’च्या उमेदवारांची अधिकृत यादी जाहीर केली असून, एकाच झटक्यात निवडणुकीचे संपूर्ण वातावरण तापवून सोडले आहे.
या निवडणुकीत सतेज पाटलांनी खेळलेला सर्वात मोठा डावपेच म्हणजे त्यांनी प्रस्थापित आणि नवख्यांचा साधलेला अचूक मेळ! तब्बल १८ नवीन चेहऱ्यांना संधी देत आणि अवघ्या ७ विद्यमान संचालकांना पुन्हा रिंगणात उतरवत त्यांनी राजकारणातील जुनी साचेबद्ध चौकट मोडून काढली आहे. सर्वसाधारण गटातून शशिकांत पाटील चुयेकर, बाबासाहेब चौगुले, उदय पाटील, बाबासाहेब देवकर, सत्यजीत (आबा) पाटील, अभिजीत तायशेटे, किसन चौगुले, रणधीर मोरे, सचिन घोरपडे, विश्वजीत जाधव, राहुल देसाई, दादासाहेब पाटील, विकास पाटील, भीमगोंडा बोरगावे, विद्याधर गुरबे, सुभाष डोंगरे, विशाल पाटील, विश्वजीत पाटील आणि शहाजी इंगवले अशा तगड्या शिलेदारांना त्यांनी मैदानात उतरवले आहे. महिला राखीव गटातून रंजना रेडेकर आणि भाग्यश्री डोंगळे या रणरागिणींना संधी दिली गेली आहे. तसेच, सामाजिक समतोल साधत इतर मागासवर्गातून शशिकांत खोत, अनुसूचित जाती-जमातीतून राजू आवळे आणि भटक्या विमुक्त जमातीतून बयाजी शेळके यांच्यावर विश्वास टाकत एक सर्वसमावेशक राजकीय चक्रव्यूह रचला आहे.
दुसरीकडे, महायुतीनेही आपल्या २५ उमेदवारांची यादी जाहीर केली असून, त्यात १४ विद्यमान संचालकांनाच पुन्हा पसंती दिली आहे. सध्या भाजपला गोकुळवर वर्चस्व प्रस्थापित करायचे असून, इथले पत्ते हसन मुश्रीफांच्या हातात आहेत. या पार्श्वभूमीवर सतेज पाटलांसमोरील आव्हान सोपे नक्कीच नाही. पण, पाटलांनी नुसती उमेदवारांची यादी जाहीर केली नाही, तर महायुतीच्या कारभारावर अत्यंत सडेतोड आणि घणाघाती टीकाही केली आहे. “महायुतीचा संपूर्ण कारभार केवळ मुंबईतून चालतो. प्रशासक आणायचा की नाही, हे मुंबईत ठरतं. उद्या गोकुळचा कारभारही तिथूनच चालेल, फक्त आता म्हशीची धार कधी काढायची, हे मुंबईने ठरवू नये एवढीच माफक अपेक्षा आहे!” असा थेट आणि बोचरा वार करत त्यांनी स्वाभिमानी कोल्हापुरी बाण्याला साद घातली आहे. यातच आता महायुतीविरोधात एल्गार पुकारणाऱ्या राजू शेट्टी यांची मिळालेली भक्कम साथ सतेज पाटलांसाठी या अटीतटीच्या लढाईत मोठी जमेची बाजू ठरणार आहे.
फक्त राजकारण नव्हे, तर शेतकऱ्यांच्या हिताचा एक आश्वासक जाहीरनामाही या पॅनलने प्रसिद्ध केला आहे. आगामी ५ वर्षांत रोजचे दूध संकलन २० लाख लिटरवरून तब्बल ३० लाख लिटरच्या पार नेण्याचे मोठे उद्दिष्ट त्यांनी ठेवले आहे. शेतकऱ्यांना थेट आर्थिक दिलासा देण्यासाठी म्हशीच्या दुधाला ५ रुपये आणि गाईच्या दुधाला २ रुपयांची दरवाढ, सोबतच म्हशीच्या दुधासाठी ३ रुपये दूध फरक बिलात भरीव वाढ आणि पशुखाद्याचे दर थेट १०० रुपयांनी कमी करण्याची अत्यंत कळीची घोषणा त्यांनी केली आहे. सध्या मिळणाऱ्या ८६ पैशांऐवजी प्रति रुपया ९० पैसे दूध उत्पादकाला परत देण्याचा संकल्पही या जाहीरनाम्यात आहे. याशिवाय, दर्जेदार आरोग्य सेवा, महिला व युवकांना रोजगार, पारदर्शक कारभारासाठी ‘आर्टिफिशियल इंटेलिजन्स’ (AI) सारख्या आधुनिक तंत्रज्ञानाचा वापर आणि गोकुळच्या उत्पादनांना व्यापक बाजारपेठ मिळवून देण्याचे व्हिजन त्यांनी मांडले आहे. गोकुळची ही लढाई केवळ स्थानिक वर्चस्वाची राहिलेली नाही, तर अप्रत्यक्षपणे अमूल (Amul) सारख्या राष्ट्रीय ब्रँडशी सुरू असलेल्या स्पर्धेत गोकुळचे सहकारी तत्त्व जिवंत ठेवण्याचीही आहे.
सतेज पाटलांनी कोल्हापूरचा कोपरा न् कोपरा पिंजून काढायला सुरुवात केली असून, त्यांचे हे १८ नवखे शिलेदार जुन्या प्रस्थापितांच्या गोटात किती मोठी खळबळ उडवून देतात, याकडे संपूर्ण महाराष्ट्राचे लक्ष लागून आहे.
तुम्हाला काय वाटतं? सतेज पाटलांनी १८ नव्या चेहऱ्यांना संधी देऊन खेळलेला हा ‘मास्टरस्ट्रोक’ गोकुळच्या निवडणुकीत खरंच परिवर्तन घडवून आणेल का? की मुश्रीफांच्या नेतृत्वात महायुती बाजी मारेल?
