🚨 सांडपाणी घराकडे वळविल्याच्या कारणावरून शेजाऱ्यांमध्ये वाद; महिलेला मारहाण! यड्राव येथील घटना; महिलेच्या तक्रारीवरून पती-पत्नीविरुद्ध शहापूर पोलीस ठाण्यात अदखलपात्र गुन्ह्याची नोंद

यड्राव प्रतिनिधी : घरासमोर झाडू मारत असताना शेजारच्या घरासमोरील साचलेले पाणी आपल्या घराकडे वळविल्याच्या कारणावरून झालेल्या वादात महिलेला शिवीगाळ करून मारहाण केल्याची घटना यड्राव येथील सांगली नाका परिसरात २१ ऑक्टोबर रोजी दुपारी साडेबारा वाजण्याच्या सुमारास घडली.
याप्रकरणी आशा अनिल चौगुले (वय ३९, रा. सांगली नाका, यड्राव, ता. हातकणंगले) यांनी शहापूर पोलीस ठाण्यात तक्रार दिली आहे. त्यांच्या तक्रारीनुसार, मिनाज इब्राहीम जमादार (वय ४२) आणि इब्राहीम मुबारक जमादार (वय ४८, रा. सांगली नाका, यड्राव) यांच्याविरुद्ध भारतीय न्याय संहितेच्या कलम ११५(२), ३५२, ३५१(२) व ३(५) अन्वये अदखलपात्र नोंद करण्यात आली आहे.
पोलिसांनी दिलेल्या माहितीनुसार, तक्रारदार आशा चौगुले आणि संबंधित व्यक्ती एकमेकींच्या शेजारी राहतात. २१ ऑक्टोबर रोजी दुपारी आशा चौगुले या आपल्या घरासमोर झाडू मारत असताना शेजारी राहणाऱ्या मिनाज जमादार यांनी त्यांच्या घरासमोरील साचलेले पाणी झाडूने चौगुले यांच्या घराच्या दिशेने ढकलले. याबाबत जाब विचारला असता, मिनाज जमादार यांनी अश्लील शिवीगाळ करून हाताने मारहाण केली तसेच गाऊन पकडून ओढल्याचे तक्रारीत नमूद आहे. यावेळी इब्राहीम जमादार यांनीही शिवीगाळ करून पुन्हा मारहाण करण्याची धमकी दिल्याचा आरोप आहे.
या घटनेनंतर आशा चौगुले यांनी शहापूर पोलीस ठाण्यात जाऊन तक्रार दिली. त्यानुसार पोलिसांनी अदखलपात्र नोंद केली आहे.
या प्रकरणाची नोंद पोलीस हेड कॉन्स्टेबल चव्हाण यांनी केली असून, पुढील चौकशी पोलीस हेड कॉन्स्टेबल कांबळे करीत आहेत.

Author: Vishal Kranti