🚨 सांडपाणी झाडल्याच्या कारणावरून शेजाऱ्यांमध्ये वाद; महिलेसह पतीला मारहाण यड्राव येथील घटना; काठीने मारहाण करून जीवे मारण्याची धमकी दिल्याची फिर्याद

यड्राव प्रतिनिधी : सांडलेले पाणी खराट्याने ढकलत असल्याच्या कारणावरून झालेल्या वादातून महिलेसह तिच्या पतीला मारहाण करून जखमी केल्याची घटना यड्राव येथील आरकेनगर, सांगली रोड परिसरात घडली. याप्रकरणी शहापूर पोलीस ठाण्यात तीन जणांविरोधात गुन्हा दाखल करण्यात आला आहे.
पोलिसांकडून मिळालेल्या माहितीनुसार, मिनाज इब्राहीम जमादार (वय ४२, रा. आरकेनगर, सांगली रोड, नेत्रा हॉटेलच्या पाठीमागे, यड्राव, ता. शिरोळ) यांनी याबाबत फिर्याद दिली आहे. आशा अनिल चौगुले (वय ३९), सुमन तुकाराम जाधव (वय ६०) आणि प्रकाश तुकाराम जाधव (वय ४०, सर्व रा. आरकेनगर, यड्राव) अशी गुन्हा दाखल झालेल्या आरोपींची नावे आहेत.
दिनांक २१ ऑक्टोबर २०२६ रोजी दुपारी सुमारे १२ वाजण्याच्या सुमारास फिर्यादी यांच्या घरासमोरील रस्त्यावर ही घटना घडली. सांडलेले पाणी खराट्याने ढकलत असल्याच्या कारणावरून आरोपींनी संगनमत करून फिर्यादी यांना शिवीगाळ केल्याचा आरोप आहे. यावेळी प्रकाश जाधव याने फिर्यादी यांच्या कपाळाच्या डाव्या बाजूस काठीने मारहाण करून जखमी केले. पत्नीला सोडविण्यासाठी आलेल्या इब्राहीम जमादार यांच्या पाठीवरही काठीने मारहाण करून त्यांना जखमी केल्याचे फिर्यादीत नमूद आहे. तसेच दोघांनाही पुन्हा मारहाण करण्याची धमकी दिल्याचे तक्रारीत म्हटले आहे.
जखमी दाम्पत्याने इंदिरा गांधी सामान्य रुग्णालय, इचलकरंजी येथे उपचार घेतल्यानंतर शहापूर पोलीस ठाण्यात जाऊन तक्रार दिली. या तक्रारीवरून पोलिसांनी भारतीय न्याय संहितेच्या कलम ११८(१), ११५(२), ३५१(२), ३५२ आणि ३(५) अन्वये गुन्हा दाखल केला आहे.

Author: Vishal Kranti